[食評][灣仔]慶吉家,BUGER HOME

之前有位學生係灣仔返學，問佢個頭有乜食，就
叫我去慶吉家，一定要食佢個豬排飯，去到依頭
都幾多野食，最出名既華星都係到，去到門口見
到橙色的招牌，就係到諗係咪食吉列豬既都係橙
色同有個吉字
鋪仔細細都係得幾張枱，兩位哥哥仔廚房樓面行
出行份，我當然就聽話叫份咖哩豬排飯，上碟後
係一份簡單平實的豬排飯，乜都冇的咖哩汁，另
一邊係飯同豬排，我鍾意喎，簡簡單單不造作，
日本人自己屋企整既咖哩咪就係咁簡單囉，日式
咖哩的飯就一定珍珠米先好食，當然主角的吉列
豬排果然唔錯，一d都唔厚的炸粉，有點似台式
炸雞既口感，有鬆有脆唔係只係食粉，而內裏豬
肉又嫩口，真係冇介紹錯


地址:灣仔交加里51號保和大廈地下H舖

電話:2574 4911

當我食完再諗住行下既時候，轉角就見到又係細細間食漢堡包的小店，我俾佢招牌上的芝心漢堡吸引左入去，都係只可以坐幾個人的細店，咁岩見到個哥哥拎個外賣送出去唔知邊度~應該做外賣多,叫左份芝心漢堡，即叫即整，烘熱過的面包，手打牛肉漢堡的新鮮香味同鬆軟但好咬口，咬落去內裏的芝士流出黎，只可以話滿足，掛住食既關係我唔記得影個包，哈哈



地址:灣仔交加里51號保和大廈地下12號舖

電話:2575 1575

[食評][牛頭角]談風：vs：再說

談風：vs : 再說，個名咁有詩意，我依個偽文青就俾佢吸引左，即刻覺得個名想表達談笑風生，擇日再說，食肆黎講真係靚名，利申係我估既
不過地理位置都幾隱世，沿途都係車廠，有不少車泊係路邊，唔專門搵都唔會知，上到去就會見到，門口幾部單車同舊香港既擺設裝修， 就好似由繁忙既街道，踏入以前舊香港既世界，菜式都算西餐，以前舊香港食西餐都非富則貴，依次仲唔幻想自己係貴公子
菜單菜式好似會轉，今次我叫左雞同玫瑰泡沫咖啡，首先到係暖粒粒脆卜卜既麥包，咖啡其實我唔識飲，好似有玫瑰味又好似冇，主菜黎到雞+栗米餅，首先雞肉十分嫩口，配上忌廉，同栗米汁，而且加上孜然同蒜頭，味道再多一點層次，栗米餅炸得好好，外面好脆，內裏軟綿綿好似蛋糕咁，不過冇乜味，要沾多d忌廉同栗米汁
環境同食物既關係，好快就食完，其實想再叫多份甜品食，但佢既甜品同正餐一樣，為有下次有機會先再試，題外話見隔離枱拎哂相機影，唔知係咪食評家呢？

地址:牛頭角觀塘道316-318號志聯工廠大廈10樓B號舖

電話:2415 4999

[食評][觀塘]八一0四生活盒子

其實我不停諗更個名點黎，0四就應該係04室啦，八一唔通係81年?風格又的確有d懷舊感覺，由其係d簡單傢俬

Set有3個，有個係中餐都幾得意，不過心急同趕時間既人就唔岩黎，因為每次整都係得1，2份，起碼要等15分鐘到
今次簡個"波羅沙嗲肉片飯"+中湯+菜心，都幾正聞住咖啡味，但飲更中湯同係到扒飯，但個沙嗲汁冇得頂，沙嗲當然夠味啦，最重要融入埋甜既波羅汁，兩隻味都有既肉片，真係好送飯
食完加多$15要多個蛋糕食下，順便上埋杯熱朱古力，慢慢嘆下

地址:觀塘成業街19-21號成業工業大廈1樓04室

電話:3460 4111

[食評][尖沙咀]半熟工房

有人請食好野，好似排左3粒鐘先買到，但我食既時候可能已經擺得耐啦，本身會漲起既明顯搭左，味就都好食，但食唔到新鮮半熟既感覺

地址:尖沙咀金馬倫道6A地下

電話:6129 9293

[食評][北角]俺之沾麵

本來原定計劃唔係食依間，但咁岩行過時，見到鋪仔細細，好有日本細店感覺，但行左入去，入到去真係好細，得個4張4人枱，樓面得一位姐姐

落左個原味既沾面，聽到姐姐落ordar都係講日文，有時廚房溝通好似都係講日文，唔提醒下自己都以為係日本
好，個面黎到，將個湯同配料撈埋一推，面都偏硬但性在夠彈，沾落湯到雖則沾少少，就味道就已經好足夠，豬肉都有心思咁其實煎過，
咁岩對面叫左個冷面拼盤，下面有冰盤墊住，上面的材料十分整體，都幾靚，而且聽到佢講d冷面好爽口，搞到我好想問佢食一啖
食哂d面之後，佢會問你再加唔加清湯落湯到，等溝淡一d湯成碗飲，同叫你最好唔好用匙羹飲，d醬油，7味粉，蔥之類係入面， 飲落感覺都幾似胡椒豬肚湯

地址:北角蜆殼街6-16號寶榮大廈地下D1號舖

電話:3486 6090

[食評][觀塘]HOWE Furniture & Cafe

見到個名叫HOWE,擺明就想做HOME啦，所以一眼就會見到好多傢俬，想有家既感覺，不過我望多幾眼就覺得係傢俬食飯，不其然坐底左之後，張枱又真係有標價錢，再望下其他傢俬大多數都係可以買既，d傢伙都又真係幾靚既，坐底食野都舒服

咁我就選擇左個set lunch"羅馬茄汁雞肉意粉"加杯熱既"洋金菊"花茶，但花茶用紙杯有點失望，我專登打開杯蓋，等花香散出黎，嘴就滿滿茄汁意粉，聞就洋金菊花茶，而且咁岩播更lana del ray，覺得有係外國的感覺

話哂都叫cafe當然其實甜品先係主角，大多都係芝士蛋糕同朱古力，唯獨有個蘋果批，其實我好少食蘋果批，因為要好食其實好考功夫，最終都特別d，叫左個"蘋果批加吉士打醬"，咁烘熱再俾我食，食落口都好有驚喜，暖粒粒的蘋果批甜酸味岩岩好，冇乜人工甜味，而且加埋吉士打醬的甜又冇搶出黎，味道相當夾，而且點解一開始我會選擇熱花茶，因為食一啖我又飲一啖花茶，花茶的香再加埋落去，perfect match

食完最後再上一上去天台望下個燒烤場，有機會都試下係到bbq

地址:觀塘興業街19號明生工業大廈11樓

電話:3689 0085